فرانسا رجعي فين مشيتي يا مون أمور



     رجعي يا فرانسا رجعي ، فين مشيتي وخليتينا هايمين ؟ رجعي يا فرانسا بلادنا من نهار خرجتيها وهي اللور اللور ، البلاد كانت غادية في البناء والعمران والنظام .. وملي خرجتي كولشي تقشر و تكال وطاح .. رجعي يا فرانسا الصبيطار لي بنيتي باقي لحد الآن صحيح وواقف ، وصبيطار بلادي غير هنا هنا تبنى وهنا هنا طاح .. رجعي يا فرانسا وسمحي لينا خرجناك بالعنف سمحي لرجالاتنا ، راه غير كانت عندهوم النفس ومرضاوش بيك .. رجعي حنا كنرحبو بيك .

    رجعي يا فرانسا راه شبابنا فقد الأمل فبلادو وبغاك نتي يا فرانسا ، حيت ناسك ناس الخدمة والمعقول ، ماشي تاع الشفرة والفساد .. رجعي يا فرانسا .. رجعي يا مون أمور .. رجعي نتي مولات الخير .. رجعي نتي مولات النظام .. رجعي نتي مولات الخدمة .. رجعي نتي مولات التقدم ..معاك كولشي خدام ، بيك كلشي مزيان ، بيك كولشي يصير منظم وكولشي معاك يكون قاري وفاهم .. أجي حاربي لينا الامية وقادي لينا الطرقان ، ووفري لينا الدوى ، وخرجينا من الديور ديال القصدير ، أجي يا فرانسا قادي لينا التلفازة راه فيها الطشاش .. رجعي يا فرانسا شكون قـلـقـك وشكون جـرى عليك ، رجعي قرينا القرايا لي قريتي للقدام ، راه التعليم ديالنا ضرباتو جايحة .. رجعي يا فرانسا رجعي يا مون أمور .

    ولكن عرفتي أش نقول ليك ؟ بقاي فداركوم ، المغاربة عندوهم نفس حارة وميرضاوش البراني يبني ليهوم البلاد ، وحتى حد ميسمح ليك تعفطي على شبر من ترابنا ، هذا جهدي عليك ، غير بقاي راه المغاربة ، واقيلا ، واقيلا ، ... واقيلا قادين بشغلهوم .


تابع القراءة...