بغيت نقطع التدخين

لقيت فهاد الآونة الأخيرة واحد الموقع إلكتروني لمساعدة كل من له تساؤل معين في أي مجال هاد الموقع سميتو عـــفاك
الأجوبة ماشي مول الموقع لي كيجاوب عليهوم وإنما الأعضاء بنفسهوم هوما لي كيجاوبو على أسئلة بعضهم البعض
على أي لقيت سؤال لواحد السيد كيطلب من الأعضاء يعاونوه بشي اقتراحات باش يتخلى على التدخين
وأنا جاوبتو بطبيعة الحال لأنه ميمكنش نكون عارف شي حاجة ونخبيها على خويا الإنسان مهما كانت
وهادي إجابتي بغيت يستافد منها عدد كبير :



السلام عليكم، بالنسبة ليا الإمتناع على التدخين خاصو يكون عبر مراحل، يعني ماشي تقول أنك غادي تقطعو مرة وحدة هذا ميمكنش لأن إذا قطعتيه فنهار واحد كون أكيد غادي ترجع ليه مرة أخرى ولكن الإنقطاع خاص يكون تدريجي، مع اختيار مناسبة معينة تساعدك وأحسن مناسبة هي رمضان.
كيما قلت ليك الإنقطاع يكون تدريجي يعني إلى كنتي كتكمي باكية فالنهار والبكية فيها عشرين سجارة مثلا اليوم غادي تكمي غير 15 وغدا 15 وبعد غدا 12 وبعد سيمانة غادي تولي كتكمي مثلا غا 8 فالنهار وهاكا تدريجيا حتى تولي كتكمي 8 فالأسبوع يعني غير مرة مرة وهكذا حتى يولي التدخين غير ذكرى فحياتك  ..
إظافة إلى أنك خاصك تملأ وقت الفراغ ديالك بأشياء مثل القراءة القيام بهويات مثل كرة القدم الأنترنت، الكتابة، الصلاة ...
ثم متجلسش فالأماكن لي كيكونو فيها الكمايا امتانع عليها كليا، ومترافقش مع الناس لي كيكميو واخا يكونو صحابك ما فيها باس تيعد عليهوم شهر أولا شهرين في سبيل الإمتناع عن التدخين.
وفي الأخير لابد من دعوة الله في السجود والإلحاح في الدعوة وبالتوفيق ..

0 التعليقات:

إرسال تعليق